تمتع بـ"الدعارة" تحت سفح الهرم

صراحة توقفت كثيراً قبل أن أبدأ في الكتابة متسائلاً: بماذا أبدأ وبماذا أقول؟! لكن الموضوع ببساطة عن صورة لفتاة عارية تحت سفح الأهرامات، وصور أخرى لفتيات في أوضاع مخلة داخل المعابد والأماكن السياحية -آه والله- والجميل إن ده كله في حراسة الشرطة..



وحضرتك بتتصفح موقع اليوم السابع تلاقي خبر أوّل بيقول:

"صور إباحية تُروج للدعارة تحت سفح الأهرامات، وصور التقطت بمناطق سياحية مختلفة كالأقصر وسقارة تحت سمع وبصر الأجهزة الرقابية والتنفيذية".

وباقي الخبر كالآتي:

"كشفت صور فوتوغرافية -حصل عليها اليوم السابع- عن قيام شركات سياحة أجنبية بتصوير فتيات في أوضاع فاضحة ومخلة بالآداب داخل منطقة الأهرامات، كنوع من الترويج الدعائي لسياحة الدعارة في مصر".

وطبعاً لا يقدر أحد على أن ينطق بربع كلمة، دي السياحة يعني مصدر الدخل الأول لمصر، تقول لي بقى دعارة، تجارة، حقارة، إعارة يا حاجة إعارة..

المهم السياحة ما تتأثرش والدليل على ذلك أن شرطة السياحة هي التي تحمي في المقام الأول السياح والأجانب -ولو أنت ولا مؤاخذة دكر واعذرني أصل أنا بجد محروق أووووووي ابقى فكر تبص أو حتى تطل على حد من الأجانب اللي ماشيين تلاقي قفا معتبر وكام شلوت وحضرتك مشرّف طبعاً في البوكس اللي ما تعرفش جه منين، واسأل إخوانا في الغردقة!!!!

وتبرز إحدى الصور فتاة تكشف عن ملابسها وبجوارها أحد أفراد الأمن ينظران إليها، في غياب الجهات الرقابية المتمثلة في وزارات الداخلية والثقافة والسياحة والهيئة العامة للآثار، كما تظهر فتيات عاريات تماماً في مناطق سياحية أخرى مثل منطقة هرم سقارة ومعابد الأقصر، فيما تم تصوير عدد كبير من هذه الصور بعيداً عن أعين الأجهزة الرقابية في المناطق السياحية.

الصور دي تم التقاطها في حراسة الشرطة وده عشان حماية الأجانب من عيون المصريين وعشان ما يبقاش اللي ما يشتري يتفرج، وأهي حاجة ببلاش كده، ما هو صحيح لو أنت ماشي في الشارع ولقيت اتنين أجانب "بيبوسوا" بعض هتقول عادي ويمكن تلاقي جانبك ظابط مبحلق عينيه، لكن لو لقيت "واد" من عابدين ماشي وحاطت إيديه على كتف البنت اللي جانبه ولمحه أمين شرطة بات في غيابات المجهول!!

مطالبة للجنة الشعبية لدعم ومناصرة القضايا الوطنية بالأقصر ولجنة مكافحة الفساد بالمدينة واللجنة العامة للحزب الجمهوري الحر واللجنة العامة لحزب الأحرار واللجنة العامة لحزب التجمع، بالتحقيق في قيام مجموعات سياحية بالتقاط صور فاضحة لفتيات أجنبيات وسط معابد الأقصر استجابة لما انفرد موقع اليوم السابع بنشره.

تحذير للجنة الشعبية والأحزاب والقوى الوطنية الموقعة على البيان من تنامي السياحة الجنسية وتزايد أعداد السيّاح الشواذ المقيمين في الأقصر، وتطالب بتحديد المسئول عن التقاط هذه الصور الفاضحة وسط آثار الأقصر، ومحاسبتهم.

بيان وتحذير وشجب وندب هذا كل ما استطعنا فعله، بيان -حتة ورقة يعني- وبالعربي مش بالإنجليزي ولا الفرنساوي؛ عشان الناس بتوع السياحة دول يفهموا إننا زعلانين ومتضايقين من اللي بيحصل في بلدلنا!!!

إسرائيليين داخلين خارجين يبرطعوا في البلد.. وأجانب واخدين حقهم في بلدنا أكتر مننا.. ودعارة وسياحة جنسية كمان وشواذ.. كل ده في الأهرامات والأقصر!!

هو أنا باتكلم عن مصر -أيون والله باتكلم عن جمهورية مصر العربية- ولا بتكلّم عن بلد تاني؟!! ولا إحنا داخلين على نظام جديد وإحنا ما نعرفش؟!!